Publications

کچھ باتیں بوھت سوچنے کی ہوتی ہیں

کچھ دیر کے لئے مہمان کے سامنے اچھا اخلاق نبھا لینا بہت آسان ہے۔ اسی طرح رستے میں کوئی آپکو روک کر ایڈریس پوچھے، آپ انتہائی خوشدلی سے اسکو بتا دیں گے۔ سوشل میڈیا پر بھی آپکے بہترین اخلاق کی گواہیاں موجود ہونگی۔ مسئلہ تو وہاں ہوتا ہے جہاں ہر وقت کا ساتھ ہوتا ہے، لین دین ہوتے ہیں، توقعات ہوتی ہیں، قربانیاں ہوتی ہیں اور انکی ناقدریاں ہوتی ہیں۔ خاندان کے لوگ، قریبی دوست جن کے ساتھ سالہا سال کا ساتھ ہو تو رنجشیں بڑھنے کے امکانات زیادہ ہو جاتے ہیں۔ ہم ہی کیوں پہل کریں، کتنی بار جھکیں، آخر کیوں؟

پہلے تو یہ سوچیں کہ آخر رنجش کا سبب کیا ہے؟ وہ جو بہت قیمتی شال آپ نے بھابھی کو دلوائی، اگلے فنکشن پر انکی بہن کو اوڑھے دیکھی؟ فلاں سہیلی کبھی آپکو خود کال نہیں کرتی، ہمیشہ آپ ہی کریں تو کریں؟ آپ نے انکے بچے کی آمین پر پانچ ہزار روپے دیے اور وہ آپکے بچے کے پاس ہونے پر بس ہزار روپے پکڑا گئے؟ میاں سو رہے ہوں تو آپ انکی نیند کا خیال رکھ کر سرگوشیوں میں باتیں کریں اور آپ آرام کر رہی ہوں تو وہ ہر دروازہ، ہر الماری زور زور سے کھول بند کر رہے ہوں؟ یہی روز مرہ کی چھوٹی چھوٹی باتیں مل کر دل میں ایک گرہ سے ڈال دیتی ہیں۔ پہلی گرہ کے بعد اگلی بہت آسان ہو جاتی ہے۔ رشتے کی ڈوری الجھتی چلی جاتی ہے کہ سرا ملنا ہی مشکل ہو جاتا ہے۔ تو پہلی گرہ پر ہی محتاط ہو جائیں۔

بہترین گمان دل میں لائیں۔ بھابھی نے کیا خبر وہ شال اسلئے اپنی بہن کو دی ہو کہ اسے بہت اچھی لگی ہو، اور وہ اپنی عزیز ترین چیز تحفہ دینا چاہتی ہو۔ جو سہیلی آپکو کبھی خود سے کال نہیں کرتی، کیا خبر بہت مصروف ہو، یا فون کھو گیا ہو، نمبر گم گیا ہو۔ تحفہ آپ جو بھی دیں، کوشش کریں کہ بس اللہ کی خاطر اور محبت بڑھانے کی غرض سے دیں۔ اگر آپکو یہ احساس ہے کہ آپ مسلسل اچھا تحفہ دیتے ہیں، دوسرے ہر بار آپکی ناقدری کرتے ہیں تو انکے لیول پر آ کے تحفہ دے دیں کیونکہ تحفہ دینے کا مقصد محبت بڑھانا ہوتا ہے۔ اگر تحفہ ہی محبت گھٹانے کا سبب بن رہا ہے تو کوئی تبدیلی کریں۔ میاں کو بھی بتائیں کہ انکی فلاں بات سے آپ کو الجھن ہوتی ہے۔

خاموشی سے کڑھتے رہنے کے بجائے اپنی بات کہہ دیجیے۔

دیکھئے، بنا بتائے بس اللہ ہی کی ذات ہے جسکو سب پتہ ہو۔ انسانوں کو منہ سے بول کر بتانا پڑتا ہے۔ یہ طریقہ بہت غلط ہے، اورمیری بہنو  میں تو عام ہے کہ دل ہی دل  میں کڑھتی جائیں گی، اوور تھَنک کر کر کے بات الجھا دیں گی، چھے اور بندوں سے کہہ کہلا کر دل ہلکا کرنے کی کوشش میں لگی رہیں گی، لیکن اس متعلقہ بندے کو ہوا تک نہیں لگنے دیں گی۔ بھئی، بولیں جو مسئلہ ہے۔ بعض اوقات کوئی بات آپکے لئے بہت بڑی ہوتی ہے، جبکہ دوسرے کے نزدیک کوئی اہمیت نہیں رکھتی۔ انہیں بتائیے کہ مجھے فلاں بات اس طرح محسوس ہوئی اور اس پر میری دل شکنی بھی ہوئی۔ سامنے والا بندہ یا تو اپنی وجہ آپکو بتائے گا جو آپکو پتہ نہ تھی، یا شرمندہ ہو کر آئندہ کے لئے احتیاط کرے گا۔ دونوں صورتوں میں رشتہ بہتر ہو جائے گا۔

توقعات کم اور حقیقت پسندانہ رکھیں۔

زندگی بہت مصروف ہے۔ ہر ایک اپنے اپنے کاموں میں مصروف ہے۔ ایسے میں یہ توقع کرنا کہ کوئی صبح جاگتے ہی آپکو گڈ مارننگ کا میسج بھیجے یا رات سونے سے پہلے دن کی روداد آپ سے شیئر کرے اب اتنا پریکٹیکل نہیں رہا۔ اسی طرح سے آپکی سالگرہ، اینیورسری، آپکے بچوں کی سالگرہ کون یاد رکھے اب۔۔ کوئی یاد کر لے تو دل سے شکر گزار ہوں، نہ کرے تو ایزی رہیں۔

خود سے چیزیں ازیووم نہ کریں۔

ممکن ہے کوئی بیمار ہو، امتحانوں میں مصروف ہو، ذہنی طور پر سٹریس میں ہو اور بات ایسی ہو کہ آپ سے کہہ نہ سکتا ہو۔ کچھ بھی ہو سکتا ہے۔ رنجش کا ننھا سا بیج دل میں آئے تو اسکو استغفار کی گوڈی سے باہر نکالنے کی کوشش کریں، نہ کہ دن رات اسکو سوچ کا پانی اور توجہ کی روشنی دے کر تناور درخت بنائیں۔ بات کریں! اور جو کہنا ہے، ڈائرکٹ کہیں۔ سوشل میڈیا پر مبہم قسم کے پیغامات دینا بہت ہی بچگانہ رویہ ہے۔

لیکن!!

اب اسکے بعد بھی کسی کیساتھ رنجش بڑھتی جا رہی ہے۔ دل مسلسل بوجھل ہے۔ روح تکلیف میں ہے۔ اسکی کوئی خاص بات دل سے نکلتی نہیں۔۔ تو دیکھیے کہ کیا اس انسان کے ساتھ نبھانا بہت ہی ضروری ہے؟

اگر تو رحم کا رشتہ ہے تو جھک جانا، پہل کر لینا ضروری ہے، گو مشکل کام ہے۔ رحم کے رشتے توڑنے پر سخت وعید ہے اسلئے احتیاط بھی اتنی ہی زیادہ۔ شوہر تو پھر شوہر ہے، اس سے بھی پہل کر لیں جتنا ممکن ہو سکے۔ یہ بات ذہن میں رکھیں کہ کسی بھی رشتے کے لئے باؤنڈریز بنائیں۔ ناقابلِ برداشت بات انکے نوٹس میں لائیں۔ مومن ایک سوراخ سے دو بار نہیں ڈسا جاتا اسلئے کسی کو اجازت نہ دیں کہ آپکو یوز کرے۔ پھر یہ بھی ہے کہ جسم کی طرح آپکی روح بھی آپکے پاس اللہ کی امانت ہے اور اس کا خیال رکھنا آپ پر فرض ہے۔ کسی کو حق نہیں پہنچتا کہ اپنے رویے سے آپکی روح گھائل کرے۔ رشتے کے اعتبار سے ایک حد تک جھکیے، آگے بڑھیے لیکن اگر پہل کرنا مزید مشکل ہو رہا ہے اور روح پر بوجھ دے رہا ہے تو راستہ الگ کر لیں۔ Let go کرنا ایک مشکل عمل ہے لیکن بار بار ہرٹ ہونے سے بہتر ہے کہ راستہ الگ کر لیا جائے۔ کسی بھی تعلق میں بہرحال۔۔ بہرحال درگزر کرنا ضروری ہے۔ ساتھ رہیں تب بھی، الگ ہو جائیں تب بھی۔ لاتعلقی کا مطلب یہ نہیں کہ کینے کا بوجھ دل میں رکھے باقی زندگی گزارنی ہے۔ معاف کریں اور آگے بڑھیں۔ آپکے مزاج کا کوئی بندہ آپکو مل ہی جائے گا۔ اور میرا تجربہ ہے کہ ڈھیروں کے بجائے وہ ایک آدھ جگری یار ہی کافی ہے

کاش کے ہم بھی سمبھل جائیں

۔‏اگر کسی کےصرف اچھے پہلو سے محبت کا آغاز ہوا ہےتو یقین کیجئےایک خامی کی مار ہے یہ محبت ..